تحديث شامل عن سوق العقارات في مصر: 2025-2026
Egypt Real Estate Market Updates & Insights: 2025-2026
تحديث شامل عن سوق العقارات في مصر: 2025-2026
بما إننا بنخلص اول كيو في 2025، لازم نبص على الصورة الكاملة لسوق العقارات في مصر، خصوصًا في المناطق اللي عليها العين زي العاصمة الإدارية، الساحل الشمالي، نيو زايد، أكتوبر، ومستقبل سيتي. السوق ماشي في اتجاه تصاعدي، والأسعار في 2025-2026 متوقع تزيد بنسبة 15%-30% حسب المنطقة والمشروع.
العوامل اللي بتحرك السوق دلوقتي ( وطبعاً في عوامل تانيه كتير صعب نقولها كلها في بوست واحد ):
1. تكلفة البناء: الحديد والأسمنت وكل المواد الأساسية بترتفع، وده بينعكس على الأسعار النهائية للوحدات.
2. التضخم وسعر الدولار: أي حركة في الدولار بتأثر على تكلفة التطوير العقاري، خصوصًا للمشاريع اللي بتعتمد على مواد مستوردة.
3. العرض والطلب: فيه مشاريع كتير، لكن الطلب ما زال أعلى، خاصة في المناطق اللي بتشهد نمو سريع.
المناطق اللي عليها العين:
• العاصمة الإدارية: خلاص الوزارات والحكومة بتنقل هناك، وده معناه طلب عالي جدًا على السكن والإيجارات الإدارية والتجارية.
• الساحل الشمالي: الوجهة الأهم في الاستثمار العقاري السياحي، و المناطق الجديدة زي مدينه رأس الحكمه و انها تبقي تحت اداره شركه مدن والمشروعات الجديدة زي Mountain View وMarassi بتأكد إن السوق هناك في ازدهار.
• نيو زايد وأكتوبر: استثمار مضمون، والأسعار بترتفع بسرعة بسبب الطلب المتزايد، خاصة في الكمبوندات المميزة.
• مستقبل سيتي: المنطقة دي بقت حديث السوق العقاري، مع زيادة الأسعار بنسبة 25%-30% في آخر سنة، وده هيكمل مع المشروعات الجاية.
التوقعات لـ 2025-2026:
• الأسعار هتفضل في ارتفاع تدريجي.
• مشاريع جديدة هتفتح الباب لمستثمرين جداد.
• العاصمة الإدارية هتبقى المركز الحكومي والمالي الأكبر.
• الاستثمار في الإيجارات هيكون مربح جدًا، خاصة في الأماكن الحيوية.
لو بتفكر تستثمر، ركز على:
• المناطق اللي لسه في أول مراحل التطوير، لأن العائد فيها هيكون أعلى.
• المشاريع اللي عليها طلب، سواء سكني أو تجاري.
• التعامل مع مطورين موثوقين عشان تضمن استثمار آمن.
بالمختصر، السوق في صعود، واللي يدخل دلوقتي هيكسب أكتر خلال السنتين الجايين!
